朋友睇完《人生中第一杯「凍檸啡」》，留言「不要放低你枝筆」，我睇完覺得呢七個字嘅威力，比一杯「凍檸啡」更加複雜。就係咁，我又要寫多一篇文。
「不要放低你枝筆」其實係充滿鼓勵嘅一句說話。感覺就好似你遇到困難，身邊嘅人叫你「不要放棄」一樣，十分正面，而你真心需要呢種「甜」。
但同飲「凍檸啡」一樣，甜係短暫嘅，酸先係最大嘅感受。而呢種酸嘅來源，咪就係「不要放低你枝筆」背後嘅真相－「枝筆其實放低咗好耐」。
作為一個早期嘅Blogger，我都係順應潮流，行到放低枝筆呢個階段。有番咁上下網齡嘅朋友，都見證咗寫Blog嘅平台，執完一個又一個，我自己都搬咗幾次地盤。如果無記錯，最後一個係Yahoo Blog。最早嗰個係Xanga，啲人通常用嚟寫日記。
依家大家去到邊都機不離手，水蛇春咁長嘅Blog難免太OUT，細細嘅螢幕要讀長長的文，對雙眼太刻薄了。所以，我跟上潮流嘅尖端，連筆都放低埋，做番一名忠實讀者，追睇仍未放棄寫文嘅Blogger。
要寫嘅嘢寫完，如果你唔小心咁有耐性讀到呢度仲未放棄，我其實寫呢篇文係想話畀你知，唔好睇少一句鼓勵說話嘅威力。
你睇七個字就搞到我寫咗七段嘢，所以平時多啲激勵下身邊嘅人吧！佢哋可能因為你一句嘢就改變咗人生，認真唔講得笑。
至於我幾時再拎起枝筆？可能係我飲凍檸鴦加薑嘅時候。
