好耐無寫文，但今日品嘗過人生中第一杯「凍檸啡」，忍唔住要動筆寫低感想：
事緣某日茶餐廳食飯，附近有人充滿霸氣地同侍應講「唔乖餐飲凍檸啡！」侍應聽到竟然唔識落單，仲走去水吧問有無呢樣嘢。
我其實同侍應一樣充滿懷疑，但最後真係有。嗰個Moment，我除咗對「凍檸啡」產生興趣，更加同自己講一定要搵機會試下。
當咖啡遇上檸檬茶，本身就係九唔搭八，但偏偏越係大纜扯唔埋，你越覺得咁先係人生。
飲過「凍檸啡」後，我第一個感覺係好難飲，睇嚟我中咗伏。不過飲咗一啖就唔飲，真係好浪費，仲要杯嘢要加多12蚊，我只好頂硬上。好彩嗒多幾嗒，我開始領悟到箇中嘅奧妙。
原來飲「凍檸啡」係飲佢嘅過程，難飲係必然，但你可以喺短時間內感受甜、酸、苦、辣人生四味，成件事即刻唔同晒。
每飲一啖，首先你嘅舌尖會立即感受到片刻嘅甜，然後就係舌頭兩側不斷地酸，最後結尾就係來自舌根嘅苦。至於辣，當然係胃入面「凍檸啡」同胃酸嘅火辣辣交戰。
每一啖口感都咁複雜，飲完一杯就好似經歷咗一次起起伏伏嘅人生，咁呢12蚊即刻抵番晒。
如果你對凍檸茶已經飲到乏味，下次可以試下「凍檸啡」。
唔係引你中伏，不過人一世物一世，有啲嘢係值得你去一試。
你懂的。
（先旨聲明，飲完肚痾乃自然身體反應）
