我玩Pokémon Go

仲記得無幾耐之前，歐洲國家盃冰島雖敗猶榮，回國後得到無數國民以英雄式歡迎接待，全場一齊有節奏地拍掌，睇到我毛管戙。原來好多人一齊做同一件事，感覺就係好正！

近期Pokémon Go大熱，見到香港男女老幼都全情投入，齊心捉精靈，感覺又係好正。相信多年後，呢個遊戲會係2016年最難忘嘅集體回憶之一。自己如果曾經參與其中，都幾值得回味。

最近我寫過一篇「日行一萬步」，而玩Pokémon最緊要就係行多啲，咁我真係無唔玩嘅理由。結果，玩咗幾日，捉咗唔少精靈，算係額外嘅收穫。

禽日新聞講香港已出現第一人儲齊142隻精靈，我暫時捉到131隻。我會繼續儲，但唔知熱潮退卻前，捉唔捉得齊。