今日打開報紙，大大個頭版，話兩鐵合併後，o係地鐵講粗口，可能會俾人罰錢，甚至拉去坐監。我咁大個仔，搭左咁多年地鐵同埋九鐵，真係唔知道有呢D條例o既存在。
你話o係地鐵度唔好食野，都話合理，但唔講得粗口，似乎有D難度！呢個社會有D人，粗口不離口，佢可以講十句o野入面，每句都加上粗口作為輔助詞。我講o既呢d人，仲要唔係好惹得o固隻，如果呢d條例通過，真係麻煩左d地鐵職員，佢地o既人身安全，都幾危危乎。
另一方面，點樣定義「粗口」，其實都幾有難度。條例係咪剩係唔俾講中文粗口，如果英文或者其它語言o既粗口，都會拉埋？
我覺得呢d條例通過，對某d人o黎講，可能間接冤枉左人。例如泰國人。佢地有d說話，o係香港人聽起上o黎，真係幾似粗口。下面我會略為介紹，順便學下泰文都好。
例如：
泰文講「再見」，廣東話大概讀成「仆梗謎」，講「再來玩」，就是「tell那媽」，兩個合埋，想講「下次再見」，就是「tell那媽仆街未」。另外，泰文入面，同「high」音有關o既多的是，「high」o係泰文解作「俾錢」。所以「tell 那媽high」，即係「下次黎玩，再俾錢。」
我唔知其它語言，會唔會出現咁樣o既情況，不過條例通過左，真o係要小心行事。其實我都撐呢d條例，因為有時地鐵入面，有d人講粗口，好梗耳，但我覺得真係好難執行！
另外，我想問，如果我用手機，拍底d人o係地鐵度講粗口，我可唔可以拎俾地鐵職員，叫他地拉講粗口o固個人？
