淋雨

淋雨的感覺好舒服好正，淋雨是我經常都想做的事，每次睇見出面落住雨，我就好想跑出去淋雨。細細個住係鄉下的時候，個天成日都落住雨，我好鍾意跑出去俾雨淋，好想知道究竟雨的味道是點樣？所以我就企係屋外，合埋眼打開口對住個天，等雨可以滴入我個口入面，我以為天上面的雨是最純淨的，味道應該好特別，但品嘗過雨水的味道後，覺得淡而無味，o固時真係有D失望。

外婆成日都鬧我，話我落雨仲走出去，有幾次淋到病埋，發起燒，外婆雖然惱我但都帶我去睇醫生，番屋企食左藥就去訓。到下次落雨我又走出去，有時雨落得大的時候，出面的路便成為小河流，最嚴重的一次及膝，我通常會去玩水，唔小心跌親就會成身都濕晒，外婆見到會捉住我黎打，其實自己細細個都受過唔少皮肉之苦，但呢D體罰對我黎講好有效，我好知道咩是o岩咩是錯，咩可以做，咩唔可以做，所以某程度上，我贊成要有小體罰。受一d皮肉之苦的記憶，對我依家黎講，都幾特別，是甜並不苦。當然我唔贊成用d重的體罰，咁樣對小朋友黎講，可能造成童年陰影都未定。

有時我一個人係屋企，碰到落雨但外婆或外公唔係屋企，我竟然會走去燒幾支香，然後對住個天拜，蓋幾個頭，祈求上天保佑外婆或外公平安返屋企，我驚佢地會被水沖走，番唔到屋企。有時等得耐左，好想喊，但好彩次次都見到佢地番番黎，我就好開心。呢D記憶，我仍然留存o係自己的記憶入面，覺得細個的自己，雖然做左一D咁好笑o既野，但覺得自己o固時已經有一片孝順外公外婆的心，真o係難得。其實呢件事，有時都仍然能夠從佢地個口中聽到，一聽到我就會心微笑，笑自己的怪，不過我係珍惜過去係鄉下同佢地一齊的生活。

人大o左，雖然唔會再去品嘗雨的味道，知道有「酸雨」呢回事，我都唔敢o係香港食雨，但仍然鍾意俾雨淋，如果o係外面突然遇到落雨，我通常會選擇一路行一路俾雨淋，特別是充滿煩惱的時候，淋雨俾我的意思，是可以將我的煩惱洗去，最煩的時候，我行得特別慢，有時合埋眼，任o的雨淋到自己濕晒，等自己淋到個心乾淨晒，一番到屋企我就即刻沖涼，費時真係病o左。

行雷閃電我唔驚，細細個已經見怪不怪，如果落起大雨我就好興奮，好多時我會坐係窗邊欣賞，睇住落雨，聽住落雨聲，伸隻手出窗外俾雨淋下，唔知係咪自己o係度回憶童年回憶，定係思念外公外婆，或是洗滌心中煩惱呢？一切都可以是o既，最緊要都是可以見到落雨，可以俾雨淋下。